index introductio imagines || partitura exemplar translatio

bibliographia e-mail

CTH 480.1

Exemplar --

Citatio: S. Görke – S. Melzer (ed.), hethiter.net/: CTH 480.1 (Expl. --, 15.02.2016)

§1

1 -- EGIR-ŠU=ma KIR14=ŠU ḫattanza ANA PĀNI KÁ É.DINGIR-LI[M t]īezi

2 -- nu ḫūdāk DINGIR-LUM IŠTU ŠA LUGAL ḫūmandāš ḫūrdiyaš uddanī gangatāizzi

3 -- UNŪT LUGAL=ma EGIR-an UL kuwatqa [ḫa]rkanzi

4 -- ŠA DUTU-ŠI=kan imma KAxU-az anda apeniššan memiškanzi

5 -- [m]ān=wa DUTU-Š[I] kuiški ANA PĀNI DINGIR-LIM idālawanni memian ḫarzi

6 -- nu=za DINGIR-LU[M] apēz uddānaz parkuiš ēš

7 -- DUTU-ŠI=ya ANA PĀNI DINGIR-LIM parkuiš ēš[t]u

§2

8 -- EGIR-ŠU=ma IŠTU LUGAL-RI ANA UNŪT MUNUS.LUGAL menaḫḫanda ḫūmandāš ḫūrdiyaš uddanī gangatāizzi

9 -- EGIR-ŠU=ma DINGIR-LUM IŠTU UNŪT MUNUS.LUGAL ANA LUGAL-RI menaḫḫanda gangatāizzi

10 -- EGIR-ŠU=ma DINGIR-LUM IŠTU LUGAL ANA U[NU]T MUNUS.LUGAL menaḫḫanda takšan [g]angatāizzi

11 -- anda=ma=kan kiššan memai

12 -- [mā]n PĀNI DINGIR-LIM kuiški LUGAL MUNUS.LUGAL i[dal]awanni memian ḫarzi

13 -- kinuna=z DINGIR-LUM apē[z] uddānaz parkuiš gangatānzašš=a2 ēš

14 -- LUGAL=ya MUNUS.LUGAL ANA PĀNI DINGIR-LIM gangatānteš p[ark]uwaēšš=a ašandu

§3

15 -- namma KIR14=ŠU ḫattanza gangatiSAR IŠTU [LUGA]L parā apēniššan ēpzi

16 -- UNŪT LUGAL=ma EGIR-an UL kuwatqa ḫarkanzi

17 -- ŠA DUTU-ŠI=kan imma apēnieššan KAxU-az weriyazzi

18 -- nu LUGAL-AM ITTI [DING]IR-LIM gangatāizzi

19 -- EGIR-ŠU=ma UNŪT MUNUS.LUGAL ITTI DINGIR-LIM gangatāizzi

20 -- EGIR-Š[U=m]a IŠTU LUGAL UNŪT MUNUS.LUGAL=ya takšan gangatāizzi

21 -- nu IŠTU ŠA LUGAL kuit gangati[SAR par]ā appanzi ŠA UNŪT MUNUS.LUGAL=ya kuit gangatiŠAR

22 -- n=at an[da ta]kšan kuwašnuanzi

§4

23 -- EGIR-ŠU=ma gangatiSAR MUNUSGÁB.Z[U.Z]U MUNUSšilallūḫi nākkiuaš peran nakkuwašš=a damai [g]angātiSAR parā ēpzi

24 -- ḫuišwandušš=a kuiuš GIŠERIN-az ḫarkanzi

25 -- nu apēdašš=a damai gangatiSAR parā ēpzi

26 -- gangati=ma ḫūdāk nakkiuaš parā IŠTU LUGAL ēpzi

27 -- UNŪT LUGAL=ma EGIR-an UL kuwatqa ḫarkanzi

28 -- DUTU-ŠI=kan imma KAxU-az anda apēniššan memiškizzi

29 -- EGIR-ŠU=ma gangatiSAR IŠTU LUGAL ANA UNŪT MUNUS.LUGAL menaḫḫanda nakkuwaš peran parā ēpzi

30 -- EGIR-ŠU=ma IŠTU UNŪT MUNUS.LUGAL ANA LUGAL menaḫḫanda gangātiSAR nakkuwaš peran parā ēpzi

31 -- EGIR-ŠU=ma IŠTU LUGAL ANA UNŪT MUNUS.LUGAL=ya gangāti nakkuwaš takšan parā ēpzi

§5

32 -- [nu=z]a MUNUSGÁB.ZU.ZU MUNUSšilalluḫi damai gangatiSAR dāi

33 -- nu ḫuišwanduš kuiuš [GIŠERIN]-az ḫ[arka]nzi

34 -- n=at apēdašš=a QĀTAMMA parā ēpzi

35 -- nakkuwaš=at māḫḫan [en]ī udd[an]ī parā appiškit

36 -- damaiš=ma MUNUSGÁB.ZU.ZU MUNUSšilalluḫi d[am]ai parkui gang[atiSAR d]āi

37 -- n=at ANA DINGIR-LIM IŠTU ŠA LUGAL parā ēpzi

38 -- anda=ma=kan kiššan memai

39 -- mān LUGAL [ akk]anza

40 -- našma ḫuišwanza PĀNI DINGIR-LIM idālawanni memian ḫarzi

41 -- kinuna EN SÍSKUR ap[ēz udd]ānaz parkuiš gangatānzašš=a ēšdu

42 -- EGIR-ŠU=ma gangatiSAR IŠTU LUGAL ANA UNŪ[T MUNUS.LUGAL par]ā ēpzi

43 -- EGIR-ŠU=ma gangatiSAR IŠTU UNŪT MU[NUS.LU]GAL ANA LUGAL menaḫḫanda parā [ēpz]i

44 -- EGIR-ŠU=ma gangati IŠTU LUGAL-RI ANA UNŪT MUNUS.LU[GA]L takšan parā ēpzi

45 -- namma [LUGAL MUNUS.]LUGAL gangatiSAR anda takšan kuwašnuanzi

46 -- nu=za warpanzi

47 -- [É.DINGIR-LIM=ya]=kan ḫarnuanzi

§6

48 -- [UD 11.KAM] QATI

§7

49 -- INA UD 12.KAM=ma KIR14=ŠU ḫa[ttanza] parkuiš MUNUS=za ANA PĀNI KÁ É.DINGIR-LIM tī[ezi]

50 -- nu DINGIR-LAM ŠA BA.BA.ZA išnit [SÍGali]tt=a nakkuwaš linkiyaš [KAxU-az] arḫa aniyazi

51 -- EGIR-ŠU=ma DINGIR-LAM nakkuwaš li[nkiy]aš KAxU-az ITTI UNŪT MUNUS.LUGAL ŠA BA.BA.ZA išnit SÍGalitt=a arḫa aniyazzi

52 -- EGIR-ŠU=ma DINGIR-LUM nakkuwaš linkiyaš KAxU-az ANA UNŪT MUNUS.LUGAL=ya ŠA BA.BA.ZA išnit SÍGalitt=a takšan arḫa aniyazzi

53 -- EGIR-ŠU=ma DINGIR-LUM ḫūmandāš ḫūrdiyaš uddanī kuiēš kuiēš idālauēš antuḫšeš tapuša=kan kuiēš araḫzeni KUR=ya x-x-[d]anteš attašš=a dān attašš=a uddanī ŠA BA.BA.ZA išnit SÍGalitta arḫa aniyazzi

54 -- EGIR-an=ma UNŪT MUNUS.LUGAL ḫarkanzi

55 -- nu=za warpanzi

56 -- É.DINGIR-LIM=ya=kan ḫarnuanzi

§8

57 -- UD 12.KAM QATI

§9

58 -- INA UD 13.KAM=ma KIR14=ŠU ḫattanza parkuiš MUNUS=za ANA PĀNI KÁ É.DINGIR-LIM tīezi

59 -- nu [DIN]GIR-LUM IŠTU ŠA LUGAL ḫūmandāš ḫūrdiyaš uddanī ŠA BA.BA.ZA išnit SÍGalitt=a arḫa aniyazzi

60 -- UNŪT LUGAL=ma [EG]IR-an UL kuwatqa ḫarkanzi

61 -- dUTU-ŠI=kan imma KAxU-az anda apeniššan m[emi]škanzi

62 -- EGIR-ŠU=ma DINGIR-LUM ḫūmandāš ḫūrdiyaš uddanī IŠTU LUGAL ANA UNŪT MUNUS.LUGA[L] menaḫḫanda ŠA BA.BA.ZA išnit SÍGalitt=a arḫa aniyazzi

63 -- EGIR-ŠU=ma ḫūmandaš ḫurdiyaš uddanī IŠTU UNŪT MUNUS.LUGAL ANA LUGAL menaḫḫanda ŠA BA.BA.ZA išnit SÍGalitt=a arḫa aniyazzi

64 -- EGIR-ŠU=ma DINGIR-LUM ḫūmandāš ḫūrdiyaš uddanī IŠTU LUGAL ANA UNŪT MUNUS.LUGAL takšan ŠA BA.BA.ZA išnit SÍGalitt=a arḫa aniyazzi

65 -- nu=za warpanzi

66 -- É.DINGIR-LIM=ya=kan ḫarnuanzi

§10

67 -- UD 13.KAM QATI

§11

68 -- namma apēdani=pat [U]D-ti LÚSANGA DINGIR-LIM GE6 nekuz meḫur šeḫelliyaš uidār dāi

69 -- māḫḫan=ma MUL-a[š] watkuzi

70 -- nu=ššan DINGIR-LUM ÍD-i katta pēdanzi

71 -- nu=ššan ANA PĀNI ÍD ḫūrdiyaš dupšaḫiti ANA DINGIR-LIM šarā ḫuittiya[u]ar iē[z]zi

72 -- dupšaḫiti=kan kuit anda ḫuwartan

73 -- n=ašta apāt ḫūr[di]aš uttar šar[ā ḫ]uittiyanzi

74 -- EGIR-ŠU=ma SÍSKUR dupšaḫin ienz[i ]

75 -- [nu kišš]an memai

76 -- kuiš=kan EN SÍSKUR ANA DINGIR-LIM dupšaḫitī anda x-x[ ...]

77 -- kinu[n]a=kan DINGIR-LUM EN SÍSKUR=ya apēz ḫurdiya[š dupšaḫiyaz] a[rḫ]a ḫuittiyanun

78 -- apāš=a=kan ḫurtaiš d[upšaḫiyaš paḫḫuenit] an[d]a warānu

79 -- DINGIR-LUM=ma=za=kan EN SÍSKUR=ya apē[z pittuliyaz] arḫa tarnanteš ēšten

80 -- EGIR SÍSKUR=ma UNŪT MUNUS.LUGAL [ḫarkanzi]

§12

81 -- n=ašta māḫḫan araḫza ANA PĀNI ÍD ašnuzi

82 -- n[=at … ]

83 -- nu ANA PĀNI Dpirinkiriya ḫurdiyaš d[upšaḫiti24 šarā ḫuittiyauar] SÍSKUR dupšaḫinn=a QĀTAMMA ienzi

84 -- anda=y[a=kan QĀTAMMA=pat memai]

85 -- [nu] ANA PĀNI DINGIR-LIM ḫurdiyaš dupšaḫiyaš [ … ]

86 -- [ … ] SÍSKUR dupšaḫinn=a QĀTAMMA ienzi

87 -- [ … ]

88 -- EGIR-an=ma UNŪT MUNUS.LUGAL ḫarkanzi

89 -- māḫḫa[n ...]

90 -- nu=za warpanzi

91 -- É.DINGIR-LIM=ya=kan [ḫarnuanzi]

92 -- namma UD.KAM-az UL kuitki [ienzi]

§13

93 -- nekuzza meḫur=ma ap[ē]dani=pat UD-ti [LÚSANGA DINGIR-LIM GE6 šeḫelliyaš uidār dāi]

94 -- māḫḫan=ma MUL-aš watkuzzi

95 -- n[u=ššan DINGIR-LUM ÍD-i katta pēdanzi]

96 -- nu=ššan pāizzi

97 -- ANA PĀNI Í[D … ] šarā ḫuittiyauar IŠTU LUGAL ie[nzi ]

98 -- [ … ]

99 -- EGIR-ŠU=ma SÍSKUR dupšaḫitin ienzi

100 -- n=ašt[a … ] paḫḫuenaz arḫa ḫuittianzi

101 -- DINGIR x[ … ]

102 -- [nu kiššan memai]

103 -- kuiš=kan PĀNI DINGIR-LIM dupšaḫitī anda EN [SÍSKUR … ]

104 -- kinuna=kan kāša DINGIR-LUM EN SÍSKUR=ya dupš[aḫiyaz arḫa ḫuittiyanun]

105 -- apāš=a=kan ḫurtaiš dupšaḫiyaš paḫ[ḫuenit anda warānu]

106 -- DINGIR-LUM=ma=kan EN SÍSKUR=ya apēz pittuliya[z arḫa tarnanteš ēšten]

107 -- UNŪT LUGAL=ma EGIR-an UL ḫarkanzi

108 -- DUTU-ŠI=kan i[mma KAxU-az apeniššan] anda memiškanzi

109 -- UNŪT MUNUS.LUGAL=ma EGIR-an=pat ḫark[anzi (…) ]

§14

110 -- n=ašt[a] māḫḫan araḫza ANA PĀNI ÍD ašnuzi

111 -- n=a[t … ]

112 -- nu uwanzi ANA PĀNI dpirinkiriya šarā x[ … ]

113 -- [ … ] QĀTAMMA iēzzi

114 -- anda=ya=kan QĀTAMMA=pat memai

115 -- [ … ] šarā ḫuittiyauar dupšaḫinn=a QĀTAMMA=pat [iēzzi]

116 -- UNŪT LUGAL=ma EGIR-an UL ḫarkanzi

117 -- ŠA dUTU-ŠI=kan i[mma KAxU-az anda apeniššan] memišk[i]zzi

118 -- UNŪT MUNUS.LUGAL=ma EGIR-an=pat ḫarkanzi

§15

119 -- māḫḫa[n=m]a UD 14.KAM lukkatta

120 -- nu=za warpanzi

121 -- É.DIN[GIR-LIM=ya=kan ḫarnuanzi]

122 -- [namma UD.KAM-az] UL kui[tk]i iyanzi

§16

123 -- nekuza meḫ[ur m]āḫḫan apēdani=pat UD-ti MUL-aš watkuzi

124 -- nu=ššan DINGIR-LUM Í[D-i katta p]ēdanzi

125 -- nu=ššan A[NA] PĀNI ÍD SÍSKUR zurkiyanza du[pš]aḫiyaš ḫurdiyaš x[ … ]

126 -- ANA UNŪT MUNUS.LUGAL [I]ŠTU KU6 SILA4=ya šipandanzi

127 -- nu UNŪT MUNUS.LUGAL kuiš EGIR SÍSKUR ḫarzi

128 -- nu=šši ḫašuwā[i]SAR pianzi

129 -- n=at anda pušš[a]izzi

130 -- anda=ma=kan kiššan m[emai?]

131 -- mān=wa ANA PĀN[I] DINGIR-LIM kuiški EN SÍSKUR idālauanni memian ḫarzi

132 -- paiddu=wa=kan edani DINGIR-LIM-aš parni and[a]n ḫurtaiš ling[ai]š paprātarr=a ḫāšuwāyaš iwar kišaru

133 -- nu=war=at ḫāšu[wāy]ašSAR iwar m[iy]ān ēšdu

134 -- nu=war=at=za namma iyatnuwan ḫāšuwāiSAR [wa]ršuwanz[i? l]ē kuiški taraḫzi

§17

135 -- kinun=at kāš[a mi]ēšta?

136 -- n=at DINGIR-LUM LÚŠE.KIN.KUD-aš māḫḫan miyān iyatnuwan ḫāšuwāiS[AR arḫ]a warašta

137 -- namma=at anda puššāit

138 -- idālu=ya uttar NIŠ DINGIR-LIM ḫu[rtāin] paprātar ḫašuwāiSAR māḫḫan anda puššaiddu

139 -- n=at ḫašša[n iya]ddu

140 -- n=at namma ANA PĀNI DINGIR-LIM=ya lē ANA EN SÍSKUR=ya=at=šan tuēkkišš[i lē]

141 -- nu DINGIR-LUM EN SÍSKUR=ya parkuwaēš ašandu

142 -- kī=ya ḫāšuwāiSAR māḫḫan anda p[uššā]it

143 -- n=at ḫaššan iyat

144 -- idālu=ya uttar NIŠ DINGIR-LIM ḫurtaiš pa[pratarr=a Q]ĀTAMMA ḫaššaš iyanza ēšdu

145 -- DINGIR-LUM=ma EN SÍSKUR=ya apēz uddānaz parkuwaēš ašandu

§18

146 -- EGIR-anda=ma=šši š[uppiwašḫa]rSAR pianzi

147 -- anda=ma=kan kiššan memai

148 -- mān=wa ANA PĀNI DINGIR-LIM kuiški kiššan mem[iški]zzi

149 -- kāš=wa māḫḫan šuppiwašḫarSAR ḫurpaštaz anda ḫūlaliyanza

150 -- nu araš aran a[rḫa UL] tarnai

151 -- idālauwanzi35=ya NIŠ DINGIR-LIM=ya ḫurtaiš papranna[nz]aš=a36 eni É.DINGIR-LIM šuppi[wašḫan]aš iwar anda ḫūlaliyan ḫardu

152 -- kinuna kāša kūn šu[ppiw]ašḫarSAR arḫa šippanu[n]

153 -- [n=an=š]an katta 1 kākin dawanin kurkun

154 -- idālu=ya uttar NIŠ DINGIR-[LIM ḫu]rtaiš paprātar ANA DINGIR-L[IM per]an arḫa QĀTAMMA šippaiddu

155 -- nu DINGIR-LUM EN SÍSKUR=ya apē[z udd]anaz parkuwaēš ašandu

§19

156 -- EGIR-anda=šši ŠU.[SAR p]ianzi

157 -- tarupan=ma=at GÙB-laz

158 -- anda=ma=kan k[išš]an memai

159 -- mān=wa A[NA PĀN]I DINGIR-LIM kuiški idālu uttar NIŠ DINGIR-LIM ḫurtai[n] paprātarr=a i[yan] ḫarzi

160 -- n=at ŠU.SAR-aš iwar tarupta

161 -- n=at A[NA ŠU.SAR G]ÙB-laz taruptat

162 -- am[mug]=at kāša EGIR-pa ZAG-az lānun

163 -- nu idālu uttar NI[Š DINGIR-LIM] ḫurtain paprā[tar]r=a namma ANA PĀNI DINGIR-LIM=ya lē ANA EN SÍSKUR=ya=at tuēkki=šši lē

164 -- nu DINGIR-LUM EN SÍSKUR=ya apēz uddanaz parkuwaēš aš[andu]

§20

165 -- EGIR-ŠU=ma=ššan ANA PĀN[I DINGIR-L]IM ištappeššar ienzi

166 -- ištappešnaz=ma=kan PA5-a[n i]yan

167 -- [IN]A ÍD=kan anda ienz[i]

168 -- [n]amma=kan GIŠMÁ.TUR IŠTU KÙ.BABBAR GUŠKIN tepu ḫališš[iyan]dan a[nd]a tarnanzi

169 -- ling[ai]š=ma ḫurtaišš=a ŠA KÚ.BABBAR GUŠKIN TUR-TIM iya[nteš?]

170 -- n=at=kan ANA GIŠMÁ.TUR and[a] tianzi

171 -- n=ašta GIŠMÁ ištappešnaš PA5-aš ištappeš[n]az parā ÍD=kan anda pē[nna]i

172 -- namma EGIR-anda Ì.DÙG.GA LÀL=ya tepu lāḫui

173 -- anda=ma=kan kiššan mem[ai]

174 -- [k]ūn māḫḫan GIŠMÁ ÍD-aš par[ā p]ēdaš

175 -- nu=šši namma ūrkeš EGIR-an UL duqqāri

176 -- kuišša PĀNI DINGIR-LI[M i]dālu uttar NIŠ DINGIR-LIM ḫurtain paprātar iyan ḫarzi

177 -- nu apātt=a ÍD-aš parā QĀTAMMA pēdau

178 -- nu kēdani māḫḫan ANA GIŠMÁ ūrkeš EGIR?-an? UL du[qq]āri

179 -- nu namma idālu uttar ANA PĀNI DINGIR-LIM=ya lē ANA EN SÍSKUR=at=šan t[u]ēkki=šši lē

180 -- nu DINGIR-LUM EN SÍSKUR=ya apēz uddanaz parkuēš ašandu

§21

181 -- kāša=šmaš Ì.DÙG.GA LÀL=ya EGIR-anda lāḫun

182 -- nu=šmaš ūrkeš EGIR-an IŠTU Ì.DÙG.GA LÁL=ya iškanza

183 -- nu=kan idālu uddār pariyan neyan ēštu

184 -- nu ÍD-aš māḫḫan EGIR-pa UL aršiēzzi

185 -- kē=ya idālauwa u[d]dār parā QĀTAMMA pēdau

186 -- EGIR-pa=ma=at lē uizzi

187 -- EGIR-ŠU=ma EN-LUM KÙ.BABBAR ŠA 3 GÍN šarā ēpzi

188 -- nu=ššan IŠTU NAMMATUM KÙ.BABBAR TUR ŠA 3 GÍN wātar lāḫui

189 -- anda=ma=kan kiššan memai

190 -- kuiš ANA PĀNI DINGIR-LIM idālu memian ḫarzi

191 -- nu kī māḫḫan wātar dankuiš taganzipaš katta pašta

192 -- apātt=a idālu uttar taganzipaš katta QĀTAMMA pašdu

193 -- [k]ē uddār parkui šiššiyann=a ēštu

194 -- DINGIR-LUM=ma EN SÍSKUR=ya apēz [udd]ānaz parkuwaēš ašan[d]u

§22

195 -- [na]kkuššaḫ[iti=ma ] ANA [ LUGAL 1 GU4.MAḪ] [AN]A UNŪT MUNUS.LUGAL=ma 1 GU4ÁB 1 UDU.“SÍG+MUNUS“ 1 UZ6=ya tarnai

196 -- [and]a=ma=kan kiššan memai

197 -- kuit kuit idālu uttar NIŠ DINGIR-LIM ḫūrtaiš [pap]rātar PĀNI DINGIR-LIM iyan

198 -- n=at kē nakkuššiēš ANA DINGIR-LIM peran arḫa [p]ēdandu

199 -- DINGIR-LUM=ma EN SÍSKUR=ya apēz uddānaz parkuwaēš ašandu

200 -- EGIR-ŠU=ma=za EN SÍSKUR IŠTU NINDA.GUR4.RA TUR GA.KIN.AG TUR=ya šarlāizzi

§23

201 -- EGIR-anda=ma zurkiyaš UZU zēyantit šipanti

202 -- namma arnamitti

203 -- nu DINGIR-LUM IŠTU KÚ.BABBAR gangadāizzi

204 -- UNŪT EN SÍSKUR=ya ITTI DINGIR-LIM IŠTU KÚ.BABBAR gangadāizzi

Kol.

205 -- DUB 2.KAM ŠA SÍSKUR URUŠamūḫa UL QATI

206 -- LÚ.MEŠAZU mā[ḫḫa]n SÍSKUR ienzi